Mkuu wa Shirika la Shirikisho la Masuala ya Vijana la Urusi (Rosmolodezh), Grigory Gurov, amesema Tamasha la Kimataifa la Vijana 2026 litageuza mji wa Ekaterinburg kuwa kitovu cha vijana kutoka duniani kote watakaokutana kujadili mustakabali wao na wa dunia kwa ujumla.
Akizungumza katika mkutano na waandishi wa habari kuelekea tamasha hilo, Gurov alisema lengo kuu la tukio hilo ni kuwakutanisha vijana wenye maono, ubunifu na hamasa ya kuleta mabadiliko katika jamii zao kupitia ushirikiano wa kimataifa. “Tunawakutanisha vijana wanaofikiria kuhusu maisha yao ya sasa na ya baadaye, pamoja na dunia wanayoijenga. Hapa washiriki wanazindua miradi, wanajenga mahusiano ya kimataifa na kuunda timu mpya za ushirikiano,” alisema Gurov.
Aliongeza kuwa jukumu la waandaaji ni kuhakikisha mazingira bora ya mawasiliano na ushiriki ili vijana hao waweze kupata uzoefu wenye manufaa na kuvutia.
Kwa mujibu wa Gurov, tamasha hilo litawakutanisha wabunifu, wanasayansi, watumishi wa umma vijana, wanablogu, wanahabari na wasanii kutoka mataifa mbalimbali duniani.
“Wakati wa Tamasha, Ekaterinburg inakuwa mji mkuu wa vijana wa dunia,” alisema.
Kauli ya Gurov imekuja wakati waandaaji wakitangaza kuwa zaidi ya watu 113,000 kutoka nchi 191 wamewasilisha maombi ya kushiriki tamasha hilo. Kwa mara ya kwanza katika historia ya harakati za tamasha hilo, idadi ya waombaji kutoka nje ya Urusi imezidi ile ya Warusi kwa zaidi ya watu 32,000.
Tamasha la Kimataifa la Vijana 2026 linatarajiwa kufanyika Septemba 13 hadi 17 mjini Ekaterinburg, likileta pamoja maelfu ya vijana kutoka mabara mbalimbali kwa ajili ya majadiliano, maonesho, ubunifu na kujenga ushirikiano wa kimataifa.
