WAZIRI wa Mambo ya Nje wa Urusi, Sergei Lavrov, amesema Moscow haina nia ya kuanzisha vita dhidi ya nchi za Ulaya, akidai kuwa ni mataifa ya Ulaya yanayojiandaa kwa mzozo wa kijeshi na Urusi.
Akizungumza katika mahojiano ya hivi karibuni, Lavrov alieleza kuwa madai kwamba Urusi inataka kupambana na Ulaya hayana msingi wowote, huku akisisitiza kuwa viongozi wa Ulaya wamekuwa wakitoa matamko yanayoashiria maandalizi ya vita katika miaka ijayo.
“Hatutaki kupigana na Ulaya. Hayo ni mambo yasiyo na mantiki. Kinyume chake, ni Ulaya inayojitayarisha kwa vita dhidi yetu,” alisema Lavrov.
Kwa mujibu wa mwanadiplomasia huyo mkuu wa Urusi, baadhi ya viongozi wa Ulaya wamekuwa wakisisitiza kuwa bara hilo linapaswa kuwa tayari kwa vita ifikapo mwaka 2030, hali ambayo amesema inaweza kuongeza hatari ya mzozo kutokana na uwekezaji mkubwa unaofanywa katika uzalishaji wa silaha.
Lavrov alisema ongezeko la matumizi ya kijeshi linaweza kusababisha kile alichokiita “utabiri unaojitimiza wenyewe,” ambapo maandalizi ya vita yanaweza kuibua mazingira ya mzozo halisi.
Waziri huyo pia alinukuu kauli ya Rais wa Urusi Vladimir Putin, akisema kuwa Moscow itajibu kwa nguvu endapo itashambuliwa.
“Putin amesema kuwa ikiwa watatushambulia, hatutajizuia. Pia aliongeza kuwa itakuwa vita vya aina tofauti kabisa na vitakuwa vya muda mfupi,” alisema Lavrov.
Kauli hizo zinakuja wakati mvutano kati ya Urusi na nchi za Magharibi ukiendelea kuongezeka, huku pande zote zikiendelea kuimarisha uwezo wao wa kijeshi na kutoa tahadhari kuhusu usalama wa bara la Ulaya.
