Wasanii maarufu duniani, Rihanna na mpenzi wake A$AP Rocky, wameendelea kudhihirisha nguvu yao katika ulimwengu wa mitindo baada ya kutajwa kama miongoni mwa nyota waliong’ara kwenye tuzo za mwaka za CFDA Fashion Awards 2025, zilizofanyika jijini New York.
Katika hafla hiyo, A$AP Rocky alitunukiwa Tuzo ya “Fashion Icon”, mojawapo ya heshima kubwa zaidi katika tasnia ya mitindo. Hii inamfanya kuungana rasmi na Rihanna ambaye alishinda tuzo hiyo mwaka 2014 na hivyo kuwa mmoja wa wachache waliowahi kupewa heshima hiyo kubwa, hasa kama wanandoa wa burudani.
Rocky alipokea tuzo hiyo kutokana na mchango wake mkubwa katika mitindo, ubunifu na ushawishi wake kupitia chapa na miradi yake, ikiwemo ushiriki wake kama Creative Director wa Ray-Ban pamoja na kazi zake za ubunifu kupitia AWGE. Uwepo wake katika mitindo umeendelea kuvuka mipaka ya muziki na kuwa alama ya mtindo wa kizazi kipya.
Kwa upande wa Rihanna, tukio hilo lilikuwa maalum zaidi kwani lilikuwa mwonekano wake wa kwanza kwenye red carpet tangu ajifungue mtoto wao wa tatu. Mwimbaji huyo alionekana katika mavazi yanayoitwa “post-partum forward look”, yakionyesha muunganiko wa umaridadi, ujasiri na mtizamo wa mama anayerejea katika majukumu ya mbele ya kamera bila kupoteza nguvu yake katika mitindo.
Wawili hao walipokelewa kwa shangwe na kuonekana kuwa kivutio kikuu cha hafla hiyo, wakionyesha mavazi ya kiwango cha juu na vito vya thamani, hatua iliyothibitisha nafasi yao kama malkia na mfalme wa mitindo ya kisasa.
Katika hotuba yake, Rocky alitumia nafasi hiyo kumshukuru Rihanna kwa kumtia moyo na kuwa sehemu muhimu ya safari yake katika mitindo jambo lililowafanya mashabiki na watazamaji kuona muunganiko wao kama nguvu inayosukuma mabadiliko katika tasnia.
Tuzo za CFDA mwaka huu zimeacha historia mpya, zikionesha sio tu mafanikio ya wasanii hawa wawili bali pia ushawishi wao wa kijamii na kiubunifu unaoenea mbali zaidi ya muziki, na sasa kuangaza katika anga la mitindo duniani.
Chanzo; Bongo 5
